草蜢上《爆谷》晒陳年肉照 蘇志威五官繃緊輪廓變晒疑似打咗嘢
上周六，ViuTV節目《爆谷一周》請嚟久別紅館5年，將於10月尾開4場Show的草蜢及其經理人林珊珊做嘉賓，現場觀眾全部都係跟咗草蜢多年的Fans，嘉賓講嘢又疊晒聲，加埋Fans起哄，所以全晚節目都非常之嘈。
因為嘉賓好多嘢講，現場觀眾又好有反應，現場好嘈。
林珊珊都有晒舊照。
呢張有三大天王，出處係珊珊最後一日嘅港台節目。
請得草蜢當然就係聽佢哋話當年，例如分享當年粉絲追星的瘋狂行為，三人回憶出道不久，為方便工作夾份買咗一架車，有次完成工作後駕車離開被大批粉絲包圍，有瘋狂粉絲爬上車頂大叫「我愛你」。蔡一傑激動表示當時立即勸粉絲，「落返嚟先啦，有咩慢慢講。」三人後來發現車身因此而凹陷，車頭位置又被粉絲以鎖匙刮下兩個心心，草蜢表示當時噴油還原車身的價錢總數，等於幾個騷嘅酬勞，因此對粉絲又愛又恨，這些事亦是歌曲《又愛又恨》的來源。
訪問中又提到當年住九龍城的生活點滴，又指陳光榮是他們的業主，近年曾經問過蔡一智記唔記得當年講過一番話，就係「我哋係草蜢，呢類偶像組合，唔通唱到40歲咩?」觀眾即時起哄，已經57歲的蔡一智、56歲的蘇志威及55歲的蔡一傑都笑言真係唔好亂講嘢呀。而阿智再補充細個住屋邨，同阿傑及蘇志威都講過，到90歲都會拎住拐杖跳舞，歡呼聲響遍錄影廠。
兩人講起舊史好激動。
蔡一智提到當年曾經講過做組合唔通唱到40歲咩?
蔡一智指細個嗰陣同隊友提過，就算到90歲都會拎住拐杖跳舞。
另外，草蜢亦帶咗唔少珍藏上節目，包括陳年雜誌封面、人生第一張黑膠碟、人生第一個演唱會及寫真集，提到影雜誌封面，蔡一智兄弟最有感受，因為無論衣著定Pose都要自己搞掂，為咗有型，兩人會去深水埗買服裝配件，例如扣針，兩人成晚就係咁又手又釘務求將一件好普通的牛仔褸變得Fashion啲，兩人坦言「以為好易，凌晨加工搞足8個鐘。」
1988年，草蜢推出第一張黑膠碟。
處男碟售30蚊，阿智話好抵，但當年物價同而家唔同。
1992年，草蜢舉行第一次演唱會嘅大碟。
陳年雜誌封面。
阿智話無論衫同Pose都係自己搞掂。
留意阿智件牛仔外套。
兩人提到要為件牛仔外套加工，搞咗8個鐘。
兩人以為易事原來好難搞。
至於寫真集，蔡一智兄弟都睇得好開心，一邊揭一邊Show畀觀眾睇，特別係蔡一傑，因為相集中有大量佢嘅露肉照，當年靚仔又大隻，難怪咁自滿，不過蘇志威就唔係咁諗，由於佢本寫真集玩黑白相，邊睇邊話大吉利是，見佢一邊揭一邊笑，眼耳口鼻都幾繃緊，心水清觀眾應該發現蘇志威個樣有啲唔同咗，見佢大笑時塊面好似唔受控制，蘋果肌有啲硬硬哋，連登仔都疑惑，留言問蘇志威咪係整咗容?你哋覺得呢?
蘇志威笑容好硬。
唔同咗樣咁。
輪廓都唔同咗。
好唔似蘇志威。
本寫真集好似出土文物。
蔡一傑係咁Show畀觀眾睇。
咁以前係靚仔嘅。
脹卜卜嘅心口。
蔡一傑話佢以前都好鍾意露肉。
蘇志威愈揭愈覺得唔吉利，因為佢影嗰輯相係全黑白。
剩係留意到蘇志威笑容。
真係完全認唔到。
有連登仔問蘇志威係咪整咗容?
8月出活動時，蘇志威個樣都算正常。