分類: 曾智華-專欄

正常又正義的人，總有扶持弱家的心態。故此當周三第三場賽事，目睹丁冠豪馬房的「輝煌精英」揮低我下注的「顏色之皇」時，小弟不單止冇谷氣，反之，為騎師梁家俊的精彩演繹起立鼓掌。

如今步入季尾，仍有四個馬房「粒粒皆辛苦」，包括容、石、鄭、丁，全部已練馬十多二十年或更長，對香港馬壇貢獻有功亦有勞。

誠然，馬圈應該汰弱留強，但上述四個馬房，以今季兵微將寡，仍能砌到接近畢業，站在看台的馬迷，實在應該給予支持及鼓勵。

在香港做練馬師非常高壓，單睇睇新西蘭練馬神童黎昭昇，雖來港前業績驕人，掃盡一級大賽，且開倉即有馬主湧到，支持滿滿。

結果？大家睇睇佢兩年前來港的樣子，與今日的比較，就發覺已火速蒼老，點解？當然是在港的練馬生涯極度磨人，稍慢交出成績已被八方攻擊，傳媒唱你冇料到，馬主絕不客氣紛紛拉倉。佢只三十五歲，當然難有老練的思維與心理質素，尤其成功慣，竟突然在香港由天堂跌至外籍練馬師的榜尾，可以想像幾大打擊！加上在港舉目無親，你話幾惡頂。幸而今屆終「畢業」，望來屆再展真功夫啦。

至於幾位在榜尾掙扎的華籍練馬師，睇睇佢哋馬房的子彈，假若不胡亂出擊，睇準形勢才報名，加上有高手騎師相助，應該7月煞科前全部過關。鬥風騷的冠軍爭奪戰，今季騎、練皆冇得爭，全是潘頓與蔡約翰天下，兩皆已可收韁過終點，完全冇足以埋身的競爭者。

明天國際三級賽，跑二千四百米大長途，反高潮，只得六匹馬參賽，告廄出三隻，即由佢揸莊任開。我會用「又龍串鳳」做二重彩複式膽，拖全餐，一百蚊睇佢點開。

今日標題可會令你想起特朗普著名喝罵：「You’re Fired！」

幾年前，資深傳媒人、公關達人及前國際集團管理人盧炳松夠鐘退休，心願是將個人由街童開始打拼，到跨國集團高層的經驗一一寫下，讓後輩分享。書名為《識做》。籌備時，基於小弟有共同信念，故有分幫手尋覓出版社。此書最寶貴的，是指出任何人要成功，有很多基本專業態度，其中之一為識做。

簡簡單單兩個字，已包含無盡智慧。事實，闖蕩職場數十年，小弟見證不少失敗例子，正是「唔識做」。錯誤以為有少少料就可肆無忌憚行事，毫不尊重既有文化及規矩。更甚，儍下儍下不懂掌權或機構的「死穴」。

最近某大集團突然火速炒咗位職員，消息一通天，此君老友無不搖頭嘆息。因佢已在機構工作多年，有功有勞，但弊在不掌握機構的死穴，結果下錯一個決定，立即令上頭震怒，即炒。其實上至國家，下至機構，其領導層及公司文化，皆有不可亂動的軟肋，一動就殺無赦。你可以唔同意，如此就應選擇離開，而不是一邊留低，一邊試圖「玩弄死穴」。因結局必定是你死而非國家、機構或領導人死。

例如小弟，天生愛自由，也有自己一套價值觀，數十年來遊走不同媒介，有些媒介就算何其甘詞厚幣，我也不會考慮。乜唔係個個都睇錢大過天的嗎？為乜有錢唔賺？

錯！正正是有啲錢，唔應該賺就唔賺，有啲機構，唔應該加入就唔加入。

口痕友話：「碌Sir，你未試過又點知喎？」

咁大個人，有腦有眼有耳有人生經驗，仲使乜下下走去試過先知呀？有冇分析能力㗎？

我講乜？你明就明，唔明就係你直覺失靈！

上周日冠軍賽馬日，三場國際一級賽皆提供馬迷大量事後回味及討論空間。

首先是主席短途獎，「嘉應高昇」又再晨操般輕鬆贏馬，將另一短途王者「里見夢境」彈離。最冇癮為「驕陽明駒」，明明跑千二也是大超班，但就因有隻「嘉應高昇」，次次無法出頭，揼心揼肺。

相信全球馬場都好奇，「嘉應高昇」鋪鋪咁贏法，究竟潛藏有幾高？希望終有另一匹子彈馬，足以逼出佢極限，且看會否快過火箭！

冠軍一哩賽爆巨冷，「紅運帝王」九十倍勝出，肯定台前幕後完全冇人信佢有任何機會W，包括事後接受訪問的騎師布文，也一臉「不可思議」款。隻馬排十二檔，開閘就放。「咁跑法，似乎有點自殺式，點帶到返嚟吖？」相信個個會咁諗。事實，呢隻馬過去跑二十八次，只在2023年元旦賽事，試過一次在千四米中放頭跑，結果也臨尾腳軟，只得第三。

今次面對馬王「遨遊氣泡」，大外檔狂放，擺明亂鬼咁跑。呢場最後二百米前，看台應該公論必快將腳軟收工。點知入到最後一百米，吓，未斷？人人擘大口得個窿，因「紅運帝王」竟將馬王頂到咳輸馬鼻。如此平磅賽事跑出九十倍大冷，簡直石破天驚，太難以置信了。

再到女皇盃二千米，小弟話明只買一二三號已夠，果然中。但冇癮在閘前九倍的「鍵琴高奏」，開閘一嘢變三倍，頂！又再慘被打劫。

呢場最令人心痛為見到日本馬后「自由島」戰死沙場，點解？冇人知。只知佢剛剛月初在杜拜鍊咗場G1大賽，月尾又搏，有需要嗎？

今晚快活谷賽事，游達榮擺強陣，安排一千米王者「顏色之皇」出戰，熱到冇味，當然應有過關馬，睇布局，「時時精準」可能負此任務。

今日標題並非搞笑，是非常認真。事實，如今除特朗普班死忠MAGA粉絲似撞邪，乜都話佢啱晒，略有理智者無不指出丁友憑蠻牛式衝動，以為一朝加關稅即可打救下沉中的美國，真的儍下儍下。最戇居事先冇詳盡部署，結果搞出一鑊泡。這已有公論，再講嘥氣。

但今日小弟想指出的是，過去四個月，狂特其實對全世界帶來了一個大突破，人人應該感謝，因佢直接令全球民智大幅提升！

單講香港，過去十年湧現不少網上KOL，個別大受歡迎，但可惜幾乎全部不是客觀分析事理，而是企在一方攻擊意識形態不同的另一方。一是狂唱好美國（或西方諸國）而針對中國，又或倒轉，凡是中國做的必定啱，純攻擊美國以霸凌手段欺壓全球。

其實，稍有智慧者都知事物不會非黑即白，這類「二分法」KOL充斥，可能市場需要，也可能純粹發洩或為幕後金主代言。

起初，我都有點興趣睇，不過，三兩年下來，開始厭倦，因班阿哥阿姐未開口，我已百分百知佢講乜、點講，完全無助智慧提升，終於決定一個都唔睇唔聽。

幸而上天自有安排，爆出個狂人美國總統運用無上權力顛覆一切，亂搞搞出正面效應大貢獻，為全球高質素的真正專家紛紛應邀出鏡出聲，從N個角度拆解特朗普關稅戰帶來美國及別國的災難效應，包括：經濟、金融、外交、科技、工業、社會、傳媒、教育……

尤其透視美國為何由二戰後的超級強國，慢慢變淪落成最大負債國，如今唔知點再債冚債，分分鐘爆煲，慘在對外四處樹敵，對內則搞到四分五裂。事實，沒有特朗普的亂搞，各方高人根本不會出手示範高層次拆局。

2012年，習近平確定11月出任中共中央總書記及中共中央軍委主席，大權即將在握。其時，大量風聲放出，佢必將辣手打貪。

當年我仍未離開咪前，朝朝在電台讀出報章撮要及作簡單分析，當中不停讀到一項，正是習近平對貪官的咬牙切齒警告，揚言準備大量「虎頭鍘」侍候。可能不少收慣賄款的高官，經歷江澤民及胡錦濤時代的寬鬆處理多年，根本不認為打貪會嚟真，應只是嚇一嚇，走過場就回復昔日現狀，故此，沒有真正戒備，也不太上心。結果，黃岐山一出，霹靂重拳日日打，大批大批貪官全被抓捕，不少高至部級。

好了，如今習主席已上場十二年，內地貪污連根拔未呢？貪污風氣及文化清除淨盡未呢？未！因人性的陰暗面永恆存在，高官一旦大權在握，面對引誘，不少就會失控。事實，數目仍相當驚人。

中紀委上周宣布，單單今年第一季，就處分了十八萬五千名官員。你冇聽錯，是十八萬五千！較去年同期增加五成，當中有十四名為省部級幹部，即理應是模範幹部及負責監察下屬必須廉潔的管理層。

點解主席辣手打貪足足十二年，班友仍然唔識死去博？無他，剷除腐敗滋生土壤仍未收效外，就是內地仍未有「高薪養廉」制度，官員權力與薪酬差距太大，自然容易行差踏錯。

最弊佢哋面對的引誘，並非十萬八萬元，甚或一百幾十萬元，而是億億聲！舉例，區區一個新疆維吾爾族副書記被抓，一查，曝光的貪污錢（未曝光未知幾巨額），已有九億港元。

天文數字的賄款，真的可以摧毁大部分官員的意志，故此，若制度不作結構性改變，可見將來還會似打儍瓜遊戲，打一個出十個。

興奮、興奮、興奮！有馬跑就興奮！當然，也可以自己呃自己話「人生有希望」。

本季最後一個大高潮，正是冠軍賽馬日，三場國際一級賽，由國際群雄爭奪總獎金七千四百萬港元，你話唔跑甩髀就奇。

外地馬實力，我哋真係識支竹咩，所以，純粹靠估靠撞彩。不過，一級賽千二米唔使估，因「嘉應高昇」為全球短途馬王，次次晨操款勝出，其他馬根本冇得跑。呢場策略，選最冷五隻，用「嘉應高昇」做膽，買Q及PQ，有機會贏餐兩餸飯。

冠軍一哩賽，「遨遊氣泡」及「錶之銀河」為主隊擂台躉，後者上仗跑錯少少，被殿堂級退休澳洲騎師戴勝柴台，潘頓冇晒面，輸馬鼻，㷫過火屎。今次又如何？我唔多睇好，因上仗最後一段飲奶力都出埋，未夠一個月，體力能否恢復，好大疑問。「遨遊氣泡」上仗輕取對手，彈離近四個馬位，冇乜用力輕勝，今次放棄二千米，改跑千六米，用意明顯，因二千長途賽國際「老虎」太多，避一避也是正確策略。

呢場用「遨遊氣泡」做膽，拖希斯阿仔的「樂觀派」、超班練馬師活侯夫人的「御皇贊助」及實力未見盡的本港精英「祝願」可也。

女皇盃跑二千米長途，香港基本冇隻得，強如打吡冠軍「百賀飛駒」，評分也極低。呢場只買一二三號互穿已足夠。「哥利巨人」最高分，唔係猛龍唔過江，此乃蘇銘倫基本坐騎，卡士高晒。「先見」專誠改配麥道朗，飛起川田將雅，一定會變身。「鍵琴高奏」去年12月跑香港國際大賽入P，休息五過月，體力充沛，再由強手連達文執韁，必須兼顧。

三場國際大賽，一齊細細注大大聲，嗌到拆天，發洩美國總統儍特帶來的鬱氣。

中美貿易戰交鋒，日日有新發展。上周開始，中國揚言限制部分荷里活片進入。香港又如何？「一國兩制」之下，應該仍自由出入，內地人可以來睇演唱會，也可專誠來港睇戲。

一直以來，香港上映電影，主要只是港產片及美國片，故此，長期以來，市民對電影視野的範圍非常狹窄。

真要多謝Netflix，全面將我的電影天空打開，原來這個世界，有太多太多出色的電影及電影工作者，只是香港的片商沒有引入，認真嘥料。

過去幾年，我已在Netflix觀賞無數精彩的不同國家電影，包括：泰國、印度、日本、韓國、英國、法國、土耳其、以色列、意大利……最近又碰上一套荷蘭精彩之作《人質危機》（《iHostage》），百分百真實個案改編。

2022年一個正常日子，阿姆斯特丹的Apple Shop如常運作，突然殺入一個手持機槍、身纏炸彈的匪徒，隨意抓着一個男顧客做人質，嚇得現場顧客及職員亂竄找地方躲避。

很快外邊已被重裝特警包圍，基於店內有大量躲起來的人質，加上綁匪揚言身上炸藥足以炸毁整座大樓，與所有人同歸於盡，令警方投鼠忌器，只得派出談判專家拖呀拖。

綁匪要求230億美元加密貨幣，這個天文數字，根本是不可能的任務。

綁架片小弟睇無數，這套因基於事實，拍起來並無太大戲劇性。但導演波比博曼斯乃製造氣氛高手，選角方面，所有警隊演員皆非常英勇正義，穿上制服時個個充滿男子氣概。劇情發展到最後有點出人意表，不似一般綁架案的結局，相當好看也緊湊。

內地唔入荷里活片，其實仍有大量精彩片種可以選擇。

初初入廣播圈，經常聽見前輩訓示新人：「淨係睇見人享受成功的光芒，而唔去了解幕後所付出的苦功，你邊有機會上位呀？」

對的，尤其是演藝圈，企出台時光芒四射，但你可知道個個皆是「台上一分鐘，台下十年功」？哪會有符符碌碌就得到持久成功的？

以為有的，必須捉去驗腦！

又例如飲食界，小弟也見證不少廚師，由做廚房仔畀師傅踢屁股階段下起步，結果二十多年後，有的仍在街邊茶記日炒夜炒得個捱字，但另外有的升到米芝蓮級大廚，又或大集團的飲食部總監。

點解？因前者不少每日落場（下午二至五時）就去嫖賭或瞓覺，很少自動自覺尋找升呢。後者呢？落場三個鐘，就用廚房設備來磨練廚藝及不停看書，借鏡前輩功力，落實鑽研，再用自己的想像力研發新菜式。

前者例子不必提了，希望能在踏入暮年前開竅。後者又如何？也有不少例子，例如香港最吃香的年輕廚藝高手周世韜（Saito），如今負責管理恆基集團三間新派菜館，由整體裝修設計到廚房出品皆極具心思。

最近有機會向佢請教，因發覺Saito炮製的佛跳牆及濃雞湯手打麵，真係冇誇大形容，正到飛起。上次幫襯（次次真金白銀），兩皆連最後一滴都灌清。「周師傅，點解你的湯水可以咁正？」

「心機加耐性再落足真材實料。例如雞湯，我會用一隻雞加火腿慢火燉出一斤湯，一對一比例，是真真實實的雞精，入口濃密帶黏性。」

「至於佛跳牆的湯底要求更高，五十斤古越龍山花雕加五十斤雞湯，慢火將其收乾至十五斤呈汁狀，放入盅仔，加名貴材料燉至全部近融化狀態，真的是一斤心機一斤湯。」

睇跑馬，除真正每場賽事外，仍有好多嘢吸睛。例如學「零零亨」咁，不時住騎練有乜不尋常舉動，有冇特別親人專誠入場（尤其外地飛來），馬主群人數多寡，是否男的執到正女的花枝招展……全部有顯示也。

我又如何？最喜歡睇睇馬主老友可有出現沙圈，因佢哋不少日理萬機需要四圍飛，若突然入場，也可能唔簡單。

上周日第九場，突見到老友「馬主L」拖住靚靚太太「斯文T」出現沙圈，與練馬師呂健威吱吱噚噚。不過，望望電算機，死得，佢隻「營造組裝」由隔夜十二倍一路路冷，跌落二十七倍，即應該瓜得。

雖然隻馬閘前慢慢升到二十二倍，但睇返佢今季表現，真真弱過藥煲，季初第一場前腿受傷退出；第二場輸八個幾馬位，二十六倍；第三場更大劑，四十四倍，入直路後轉弱。故此，今次二十幾倍，擺明冇信心，加上短途排十檔，我當然慳返。

點知開閘，嘩，騎師希威森用搶錢式騎法，一嘢霸住第二位，不停放，放呀放，入直路都仍未斷，正當人人以為佢最後一百米必腳軟，將畀如飛殺上的大熱門「河好運」擒下之際，哈，吹佢唔脹，竟能頂住贏馬頸過終點。

一睇賠率，暈低，邊個食晒？入閘二十二倍，開跑十倍？立即飛電「馬主L」：「你係咪收埋食？」「碌Sir，食鬼食馬咩，我都只係例飛，根本儍吓儍吓咋！」不過，贏馬總是開心的，因執返幾十萬元獎金，幫補天價養馬費也。

今晚賽事，我會再追「佛亮老撾」，上兩次在艾道拿胯下大熱倒灶，今次換潘頓，再唔湯唔水就攞去做狗餅。另加隻「翹峯」，未跑過快活谷，博你唔信，執三檔孭重磅，容天鵬要畢業，隻隻去！

為乜無端端問你明午有冇空？當然事出有因。兩個月前突然收到一位自稱叫阿John的訊息，希望邀請小弟做「世界閱讀日」活動嘉賓，代表的機構名「安徒生會」。

睇佢行文非常正派有禮，唔似騙徒，立即查查「安徒生會」背景。

過去十一年，我與大群志同道合朋友，每月捐幾萬元畀香港中小型及弱勢慈善機構，已過二百間，就是未聽過「安徒生會」。一查之下，真真孤陋寡聞，此會1963年由一群熱心外籍義工在九龍鑽石山區成立，其時那處布滿木屋，窮家孩子不少完全無機會入學，熱心人士希望憑僅有資源及力量，致力令該區貧困兒童能夠接觸知識，方法是引領佢哋由讀童話開始，建立興趣進入閱讀世界，然後擴闊視野，潤澤心靈，提升自信及想像空間。

安徒生會深信知識改變命運，兒童不分貧富，皆應有機會閱讀，這個，人生就有可能成功。非常有意義喎，好，第一時間應承，再睇睇要擔演甚麼角色先。

哦，易事，正是明天（4月23日）上午十一點半到九龍樂富商場中庭報到，參加《香港悅讀周2025》（「悅」，代表快樂愉悅）做開幕嘉賓，分享讀書心得。

說來，小弟童年也是家境貧困，父母皆非受過高等教育，故一切只在跌跌碰碰摸索中學習。讀的書也不多，但勝在讀得「雜」，尤其每天讀報七份（實體及網上），再加間中行書局買回的書，就這樣一點一滴累積，不知不覺間已修煉了一套基本的人生智慧及正面思維。

我絕對願意將個人的閱讀歷程與大家分享，若你明天上午十一點半有空，歡迎來到樂富中心現場，且看大家可有緣份一聚。

入戲院睇電影，與在家睇Netflix不同，在家一次過畀月費，即有天文數量選擇，故此，任何片通常只忍八至十分鐘，若不吸引，即Cut，然後Next。入戲院則不同，因要專誠去，最少三十元一次，故此，將忍耐時間調高，最少二十分鐘。

剛剛睇的一套，睇咗一小時再也頂唔順，喉嚨一直唔舒服。是否製作不認真？不是！是否很悶？不是！反之，製作很認真，導演與演員皆搏晒老命。而劇情方面，也真實震撼，令觀眾全程腎上腺素飆升。

我頂唔順乜？太真，太血腥，太冇人道！

此片《戰役》（《Warfare》），由真人真事改編，發生在2006年，美軍入侵伊拉克，引起當地敵對勢力發動聖戰，誓與美軍同歸於盡，結果血腥大戰連場（都唔知為乜）。

一支海豹突擊隊，奉命在伊拉克設立哨站，執行監視任務。以美軍的先進軍備（包括太空監察），本來無得輸，但伊拉克的土炮軍也擁有蘇聯武器及炮彈，加上膽正命平，不似美國少爺軍窒下窒下。加上美軍語言不通，人生路不熟，在接觸戰中，不一定佔上風。

電影中的突擊隊，正正中了敵人圈套，被大軍包圍下，惟有死守等待援兵。但等呀等時，不斷被猛烈炮火狂轟，成員一個又一個中彈倒下，個別被炸到肢離破碎，也有腸穿肚爛，不斷慘叫，睇之令人極度不安。提供劇本的是當日在現場炸斷雙腿的軍人，如今永久殘廢。片中一切，絕對接近真實曾發生的。

我頂唔順，因實在太血腥了，聽到被炸軍人的嚎哭慘叫，一兩分鐘尚可忍住，去到超過五分鐘，夠了夠了！喜歡戰爭片的觀眾，可以入場，應該得到與戰場一比一像真度的感受。

衡量一個騎師的高低，每位馬迷心中都有一把尺，標準各不同。我把尺的標準：一、騎功；二、鬥志；三、賠率；四、忠誠度。

就以上四項，香港兩位前領騎師，在第一項毋庸置疑，確犀利。但二、三、四呢？大家心照，根本經常「低於標準」。如此，將四項夾埋畀分，兩位高手大部時間絕不值得捧場。

例如周三騎師王，潘頓開票二點三五倍，布文四點七五倍，買佢兩個對碰，即時瓜得。

今季衡量騎師整體表現，相信大家都同意，用四項準則評核，艾兆禮及霍宏聲最值捧場。兩人的鬥志、表現及交出的成績，早已拋離昔日「三哥」田泰安。對，今年艾兆禮及霍宏聲仍未能威脅潘頓及布文，但下屆又如何？只要有足夠練馬師支持，香港由一位騎師「隻手遮天」情況，應可改寫。

艾兆禮初來香港，唔多起眼，尤其個樣似足英國諧星「憨豆先生」（Mr. Bean），完全冇一流高手的氣場。點知騎下騎下，越來越勁，尤其潘頓受傷的日子，竟搖身變成「一哥」，演出相當穩定，搏殺越來越準繩。

更重要，似乎仍有不少馬迷走眼，所以，經常賠率偏冷。周三勝出三W，竟有兩隻賠率二十一倍，較熱的亦有八倍。老友，若你是練馬師，同一匹馬，會畀邊個搏？舉例，周三尾場「有財有勢」，用潘頓，最多六至八倍矣。

睇嚟艾兆禮只要不受「大染缸」影響，在香港的策騎前途，將非常明亮！

既然今日品題艾兆禮，明日一於再捧佢兩隻蔡神仙馬——「星際快車」及「德心知遇」。前者上鋪艾兆禮執韁，已在千二米殺入第三，有機會補中！後駒乃係泥地千二米能手，今季已在此程兩W，四歲馬未用盡！

第43屆電影金像獎，我雖一票都冇得投，但作為堅貞港產片擁護者，數十年如一日套套捧場，當然有自己看法。尤其今屆，優質片特多，故此，刻意全部看一次才作「投票」決定（純個人判斷及考眼光）。

未投票前，先講講可惜。今屆的男主角候選名單，最冇癮為《武替道》的董瑋不入圍，佢實在勝《看我今天怎麼說》的游學修短馬鼻。

至於最佳女主角，沒有了《淺淺歲月》的葉童及《我談的那場戀愛》的吳君如，也令人遺憾。睇勻所有候選電影，再次肯定自己早前的決定——All In《破．地獄》，支持佢奪得本屆金像獎大部分獎項，因論水平，全面彈離。逐項分析：

一、最佳電影。要求是有深度、有信息，與時代脈搏緊扣，內容潛移默化地發人深省，對整個社會有無形的正面影響。

從以上的尺度看，四套對手，包括《九龍城寨之圍城》、《爸爸》、《看我今天怎麼說》及《從今以後》，皆未能全面達到要求，極難爆冷。

二、最佳導演。若從說故事技巧，每個分場的鋪排，誘導演員入戲，控制劇情的節奏及變化……等等，也是陳茂賢勝一籌。

本來，論功力，鄭保瑞過往的表現，高陳茂賢一班。但今次鄭導演執導《九龍城寨之圍城》，只明顯贏在動作場面及電腦技術運用，也非佢最高水準作品。反之，陳茂賢今次則令人眼前大亮，超水準。

三、最佳編劇。劇內主線人物全部能帶給大家深度思考，看看戲中人物，再看看自己，原來人人皆有地獄，這就令不少觀眾邊看邊飲泣，一再入場希望拆解自己地獄何在。編劇塑造出不同人物的地獄，令人人有共鳴，因當中真實地有你我他。

遊貴州，每朝出發前，必定被導遊提醒：「各位早晨，唔該大家一齊玩吓手機先！」入到內地，導遊第一時間收晒全團人回鄉證，因次次Check In酒店要用，之外，佢話最驚團友遺失證件，若如此，肯定煩到人都癲，故此全部由佢保管最安全。但手機唔得，個個客自己要用，而內裏也有不少私癮與證件，包括高鐵票。所以，為免大家出發時遺留手機，故才天天要求大家開車前「玩手機」呢招。

證件、手機、藥物，小弟當然緊張（錢反而冇問題，因老友大把），但其他就好易疏忽。此程帶同大大本的日記簿去，因一邊旅遊，一邊辦公，安排下半年活動。日記簿黑色，咁就弊，某日Check Out酒店，冇為意，漏低咗，去到一百公里外的下個城市才發現。點搞呢？呢本日記簿對我好重要喎，立時如熱鍋上的螞蟻，惟有向內地通「班長和」求救。

我就擔心到震，但和哥呢，笑笑口胸有成竹回應：「碌Sir，放心，你本珍貴日記簿，半日內會再出現，包在我身上。」

佢首先用手機Call酒店禮賓部，確認執房員工發現日記簿，然後用手機篤篤篤，通知快遞公司去酒店領取，送回畀我。

講都唔信，由落單開始，十小時內日記簿已經到手，物歸原主。老友，一百公里咁遠，呢種「中國速度」真係只此一家，難以想像其他城市能做到同樣服務。更離奇，只收十五蚊人仔！各位，有邊個可以解釋畀小弟聽，快遞公司究竟賺乜？指派一個速遞員，先到酒店取貨，再安排一百公里送運，人、車、油、路費……加埋收十五蚊人仔？呢種平得驚人的服務，一旦殺入香港，慘，又唔知淘汰幾多人了。

最近全球熱爆為Netflix一套劇《混沌少年時》，引起熱議，究竟應如何面對現今世代年輕人的成長。

這個課題我自問唔識，因個人成長一代，全部天生天養，個個家庭平均生四至八個，母親為湊仔及家務做到死死吓；父親一日二十四小時有十八小時在外搵食，哪有時間教仔女。

但奇，雖如此，也出了大量社會棟樑。不少高官、醫生、律師、工程師、會計師及有貢獻的公務員，全部來自木屋、徙置區、公共屋邨。有冇乜特別方法培育成長呢？一嚿雲。

剛睇到許冠文訪問，佢都話同阿Sam（許冠傑），從來冇乜特別栽培，也是屋邨仔一個。

事實，每代年輕人都有變好變壞，因素非常多，不同父母有不同做法，拗都無謂。

呢呢，剛剛搭高鐵上貴州，就更見證一幕爛口家庭，哈哈，似乎個仔又幾乖喎，難明。

我坐在一家三口旁邊，光頭老粗父親一坐低，就與老婆及個仔交談，過癮，全粗口。老婆一睇就知非善類，看似歡場阿姐級人物；個仔肥嘟嘟，十三、十四歲，比較純。

車程五小時，期間光頭父親不停與老婆交談，句句夾着問候佢老母（外母大人呀），但老婆呢，若無其事，也句句夾着生殖器官回應。

我邊聽邊偷笑，點解會有人不停問候外母，而佢個女又竟然泰然接受呢？好嘞，到光頭父親同阿仔交談，也一樣，頻頻問候佢老母。咁就奇啦，因佢老母坐隔籬，無動於衷，視若等閒，完全對粗口內容不上心。你見過這種互相問候的家庭未？係咪好奇特呢？但冷眼旁觀，個仔又幾純良，一句粗口都冇，只是乖乖的在玩手機，久不久回應粗口父母幾句。

這個家庭畀我五小時車程不少娛樂！

「活力先生」（Mr. Vitality）被譽為「馬王中的馬王」，以三十四歲之齡，安靜在英國離世，非常長壽。

資深的馬迷必定認識此王者，而我更對佢有入心入肺入血的感覺。點解？正因小弟由1996年至2014年，足足十八年，天天以「活力先生」作筆名寫專欄。基於內容觸及不少政經官場人物及傳媒逸事，而自己又坐在最前線，掌握不少讀者有興趣的八卦消息，故此，專欄一開始已惹起關注。最有趣是起初大半年，經常有人打聽誰是「活力先生」，過癮到有次與新相識江湖朋友晚飯，佢竟問我：「碌Sir，你知唔知邊個係活力先生？佢好似成個Information Sucker咁，百足咁多爪，瓣瓣通噃！」

選擇「活力先生」作筆名，乃因我對這馬有非常強烈認同感覺——正能量又充滿澎湃活力，還有，似正派代表形象黃飛鴻上身！

小弟童年開始已極之崇拜黃飛鴻，所有由關德興扮演黃飛鴻的電影，全看過最少一次，早早視之為偶像，也經常幻想自己有日成為「黃飛鴻」，執行正義，儆惡懲奸。

此外，凡認識我者皆知，上天賦予小弟極澎湃精力，永遠不會停下來，無論是玩是工作，能量都是正常人的三倍。

讀大學時住宿舍，同房的同學真係「唔得我死」，因我由朝會搵人陪玩至深夜，搞到個個彈開。

踏入社會工作也如是，正撈秘撈從未少過三份。至今七十有一，仍是周身「火噴噴」。

馬王「活力先生」拜拜了，但佢份精神，仍會長存我心間，直至永遠。

今晚告東尼馬房空群而出博過關，因纜躉「佛亮老撾」出戰，同場幾匹剛W對手，賠率應不太乏味。

周三晚沙田馬場處處眼鏡碎片，點解？正是「白果騎師」金誠剛，突然馬神上身，由本來跑咗三十一場，半隻馬都唔識贏，突然唔知搞乜，出三隻W三隻，做埋「騎師王」。

有人事先會知、會信嗎？起碼馬會操盤手一定唔知及唔信，否則點會「騎師王」開三十倍巨冷？

不過，睇金誠剛啲W飛，又幾肯定姚本輝知，因馬由佢練，並提供比金誠剛，「超加加」及「扶搖勢勁」，一匹未W過，一匹則從未出賽，竟變為全場頂頭熱門，呢啲飛邊度嚟？意即幕後人今次肥過肥仔水！

當晚慘被鬧爆的，當然為「黃寶泥」，幾乎隻隻有飛，結果只得一隻大熱「錶之多多」跑第二，其他統統瓜直。

我又如何？當然重傷，因本估計田雞會開飯，點知佢使出「軟硬鞭」最擅長的魂遊馬場大法，場場出，騎九隻，結果又冇W又冇Q，相信部分投注者似我一樣，嬲到劏田雞消夜。

明天跑沙田，潘頓復出，不少人當然慶幸有返條「扶手棍」，應有Sure Win的「嘉應高昇」出戰。但兵不厭詐，當個個都以為「軟硬鞭」會餓馬開「硬」時，佢可能就同大鱷布文玩移形換影，再間中醒隻畀鄉里「儍仔新」爆冷㗎。

二級「短途錦標」又再來次「既生瑜，何生亮」，「驕陽明駒」無奈又遇上「嘉應高昇」！今季出五次，四Q一P，就是無法出頭，點搞？是否應考慮避一避剋星，改向長途發展？

前馬王「加州星球」試閘顯示，全面復勇，彈離勝出，呢場買「乜重彩」都要預佢一票！

「主席錦標」出賽馬評分極接近，最低分的「陽光勇士」尤擅此程，兩W兩P未甩過，我會W、P共投，廿蚊雞睇有冇得嗌。

專欄日日寫，當然要搵題材。報業大旺時，有老友同一日用五個筆名孭七個專欄，真係人都癲，點搞？老江湖有一招叫「撩交打」！並非真的拳來腳往打到面腫出血，而是開打「筆戰」：「阿碌，我冇嘢寫時，就搵個專欄老友，就一個敏感話題扮鬧交開筆戰，加鹽加醋七情上面，動晒真氣咁出招。讀者乃街邊牛叔珠嬸，天性八卦，最喜歡見街上MMA（綜合格鬥），咁就可以揸機狂拍低，即傳畀老友，另一方面又大嗌——唔好打啦！『筆戰』開打，正似如此！」

此乃幾十年前流行做法，我當然唔試，因從來唔同人鬧交打交，傷身傷氣。寫專欄？思潮源源不絕，從未乾塘，點會咁老套扮同人鬧交，博讀者好奇睇？

所以，當前朝N咁多「好奇友」來訊息：「喂喂，青姐講你呀！」我幾大飲埋杯奶茶，歎埋件蛋治先睇。

哦……乜咁益我呀？賺硬稿費喎。原來老友青姐乃小弟專欄及Facebook讀者，犀利到連留言都睇埋（我大部分冇睇㗎），指出早前我論及灣仔某酒樓的「完美燒豬」，被留言大罵。我錯我錯，實在不應和盤托出大部分中式食肆的真像，正是水準飄忽不定。原因：一、大廚放假；二、周五六日忙到飛起；三、周三周日跑馬；四、大廚交徒弟落鑊。單以上四點，已足令出品水準下跌。

再者，任何食肆皆珍惜熟客，米飯班主也，故此有特別好嘢，當然預留。我食到一級豬，除避開以上四點外，更向酒樓聲明畀多點錢，兼早一個半月預訂，煩搜羅頂級材料。

老友，你想生兜兜撞入去，就有同一出品同一水平，若冇就Blacklist人哋？是否剛出世？

每個馬季有兩大高潮，一為香港國際大賽，另一為明日爆發的打吡大戰。

打吡矚目，因獎金驚人，總共二千六百萬元，兼得最高殊榮，故此騎練及馬主若有旗下馬出戰，皆緊張到腎上腺素飆升，用盡一切功力，誓死爭坐上冠軍寶座。

十四匹參戰馬，肯定有三兩隻冚手，即一直玩「真馬不露相」，只針對明天一戰，希望揭竿而起，究竟邊隻，我當然唔知亦唔識，只以高度好奇心態期待揭盅。

大賽當前，馬會為增加趣味性，找六位專業馬評人先來一次評分，預測各匹機會。結果顯示，眾專家心目中只四匹有得跑，順次序為「球星」、「祝願」、「包裝福星」及「有目共賞」。

其他機會稍次的，也只有兩匹，「玩笑」及「桃花開」。意即今屆實力相當懸殊。若大家信專家，就將最高分四匹穿勻，買二、三、四重彩，Q及PQ，再買埋W，全部細細注，希望可以入直路時有得大大聲嗌到拆天。

馬評人給予最高分的「球星」，整套部署可見練馬師希斯的精心。先經兒子在澳洲左揀右揀，精挑細選運港，由短途開始練，今季逐步催谷其氣量，跑千四米、千六米再千八米，上賽出閘最後，但入直路逢馬過馬，以極具說服力表現橫掃，打吡當然擂台躉。

力足可撼「球星」的是「祝願」，今季出七次四W一Q二P，肯定未見底，少少擔心是騎師霍宏聲及排劣檔，面對一眾世界頂級高手，臨場操控步速及走位，能否令馬匹演出巔峰呢？

小弟認為最有機會撼低「球星」是「包裝福星」，再三翻睇巡邏影片，上仗莫雷拉根本冇跑盡，沿途輕佻慢撚，全欠爭勝決心。點解？當然是將體力留待明天，一次過全面爆發！